കോട്ടയം : ഈരാറ്റുപേട്ടയിൽ കനത്ത മഴയെയും പ്രളയത്തെയും തുടർന്ന് പഠനോപകരണങ്ങളും പാഠപുസ്തകങ്ങളും നഷ്ടപ്പെട്ട വിദ്യാർത്ഥികൾക്ക് കൈത്താങ്ങായി എസ്.എസ്.എഫ് കോട്ടയം ജില്ലാ കമ്മിറ്റി. ദുരിതബാധിതരായ വിദ്യാർത്ഥികൾക്കായി സംഘടന തയ്യാറാക്കിയ പ്രത്യേക സ്കൂൾ കിറ്റുകളുടെ വിതരണ ഉദ്ഘാടനം എസ്.എസ്.എഫ് സംസ്ഥാന സെക്രട്ടറി ശുഹൈബ് പി.വി നിർവഹിച്ചു.
പ്രളയക്കെടുതിയിൽ പഠനം പ്രതിസന്ധിയിലായ വിദ്യാർത്ഥികളെ കണ്ടെത്തി അവർക്ക് ആവശ്യമായ ബാഗുകൾ,പുസ്തകങ്ങൾ, നോട്ട്ബുക്കുകൾ, മറ്റ് പഠനോപകരണങ്ങൾ എന്നിവയടങ്ങിയ കിറ്റുകളാണ് വിതരണം ചെയ്തത്. ദുരന്തമുഖങ്ങളിൽ വിദ്യാർത്ഥികളുടെ പഠനം തടസ്സപ്പെടാതിരിക്കാൻ സമൂഹത്തിന്റെ പിന്തുണ അത്യന്താപേക്ഷിതമാണെന്നും സാധ്യമായവർ സഹായഹസ്തം നീട്ടണമെന്നും ഉദ്ഘാടന സംഗമം ആവശ്യപ്പെട്ടു.
ചടങ്ങിൽ എസ്.എസ്.എഫ് സംസ്ഥാന സെക്രട്ടറി ഷാജഹാൻ സഖാഫി, ജില്ലാ ജനറൽ സെക്രട്ടറി അബ്ദുൽ റഹീം എന്നിവർ സംബന്ധിച്ചു. ദുരിതാശ്വാസ പ്രവർത്തനങ്ങളുടെ ഭാഗമായി കൂടുതൽ മേഖലകളിലേക്ക് സഹായങ്ങൾ വ്യാപിപ്പിക്കുമെന്ന് ഭാരവാഹികൾ അറിയിച്ചു.
