ഒറ്റപാലം : ഖുർആൻ പഠനങ്ങളുടെ വ്യത്യസ്തതലങ്ങളെ സ്പർശിച്ച് സംസ്ഥാന തർതീൽ ഹോളി ഖുർആൻ പ്രീമിയോ സമാപിച്ചു. മലപ്പുറം ഈസ്റ്റ്, പാലക്കാട്, കോഴിക്കോട് സൗത്ത് എന്നീ ജില്ലകൾ യഥാക്രമം ഒന്ന്, രണ്ട്, മൂന്ന് സ്ഥാനങ്ങൾ നേടി. വിവിധ വിഭാഗങ്ങളിലായി ഖുർആൻ പാരായണം, ഹിഫ്ള്, ഖുർആൻ ക്വിസ്, ആയത്ത് മത്സരം, ക്യാമ്പസ് വിദ്യാർത്ഥികൾക്കായി ഖുർആൻ മെഗാ ക്വിസ് എന്നീ മത്സരങ്ങളും ഖുർആൻ ഉയർത്തിയ വിവിധ പ്രമേയങ്ങളെ അധികരിച്ചുള്ള അവതരണങ്ങളുമാണ് തർതീലിൽ നടന്നത്.
സമസ്ത കേന്ദ്ര മുശാവറ അംഗം മാരായമംഗലം അബ്ദുറഹ്മാൻ ഫൈസി ഉദ്ഘാടന കർമ്മം ഉദ്ഘാടനം ചെയ്തു. എസ് എസ് എഫ് സംസ്ഥാന പ്രസിഡണ്ട് സയ്യിദ് മുനീർ അഹ്ദൽ അഹ്സനി അധ്യക്ഷത വഹിച്ചു. എം. വി. സിദ്ദീഖ് സഖാഫി ഒറ്റപ്പാലം,എസ്. വൈ. എസ്. സംസ്ഥാന സെക്രട്ടറി ഉമർ ഓങ്ങല്ലൂർ, എസ് . വൈ. എസ് ജില്ലാ പ്രസിഡണ്ട് അബ്ദുറഷീദ് അശ്റഫി, എസ്. എസ്. എഫ് സംസ്ഥാന സെക്രട്ടറിമാരായ ഷുഹൈബ് വായാട്, ജാബിർ കാന്തപുരം, സി. കെ. മുഹമ്മദ് ഷാഫി സഖാഫി എന്നിവർ സംസാരിച്ചു. ബാസിം നൂറാനി, മുനീർ അഹ്സനി, സി എം ജഹ്ഫർ എന്നിവർ സംബന്ധിച്ചു. ഖുർആൻ; സൃഷ്ടിയുടെ ജീവിത ക്രമം എന്ന വിഷയത്തിൽ സമസ്ത കേന്ദ്ര മുശാവറ അംഗം കൻസുൽ ഫുഖഹാഹ് കെ. പി. മുഹമ്മദ് മുസ്ലിയാർ കൊമ്പം വിഷയാവതരണം നടത്തി.
യൂണിറ്റ് മുതൽ ദേശീയ തലം വരെ ഏഴു ഘട്ടങ്ങളിലാണ് തർതീൽ മത്സര പരിപാടികൾ നടക്കുന്നത്. തർതീൽ ഹോളി ഖുർആൻ പ്രീമിയോ ദേശീയ മത്സരങ്ങൾക്ക് മേയ് 16-ന് മഹാരാഷ്ട്രയിലെ പർബാനി വേദിയാകും. വിവിധ സംസ്ഥാനങ്ങളിൽ നിന്നുള്ള വിജയികൾ ദേശീയ മത്സരത്തിൽ പങ്കെടുക്കും.
