കോഴിക്കോട്: വിദ്യാർഥികളിൽ സർഗാത്മകതയും മാനവിക മൂല്യങ്ങളും വളർത്തുകയെന്ന ലക്ഷ്യത്തോടെ എസ് എസ് എഫ് സംഘടിപ്പിക്കുന്ന സ്മൈൽ ക്ലബിന്റെ മെന്റേഴ്സ് സംഗമം പ്രൗഢമായി നടന്നു. പുതിയ അധ്യയന വർഷത്തിൽ ക്ലബിന് കീഴിൽ സംസ്ഥാന വ്യാപകമായി നടപ്പിലാക്കേണ്ട വൈവിധ്യമാർന്ന കർമപദ്ധതികൾ സംഗമത്തിൽ അവതരിപ്പിച്ചു. വിദ്യാർഥികളുടെ മാനസിക-ബൗദ്ധിക വികാസത്തിനും സാമൂഹിക പ്രതിബദ്ധത ഉറപ്പുവരുത്തുന്നതിനും മുൻഗണന നൽകുന്ന രീതിയിലാണ് പുതിയ പദ്ധതികൾ വിഭാവനം ചെയ്തിരിക്കുന്നത്.
കേരള മുസ്ലിം ജമാഅത് സംസ്ഥാന സെക്രട്ടറി മജീദ് കക്കാട് സംഗമം ഉദ്ഘാടനം ചെയ്തു. വിദ്യാർഥികളെ ഉത്തമ പൗരന്മാരായി വളർത്തിയെടുക്കുന്നതിൽ മെന്റർമാരുടെ പങ്ക് വലുതാണെന്ന് അദ്ദേഹം ഓർമിപ്പിച്ചു. അനസ് അമാനി പുഷ്പഗിരി, മുനവ്വർ അമാനി, ശുഐബ് വായാട്, മുഹമ്മദ് ബാസിം നൂറാനി, സഅദ് ഖുതുബി, പി ടി റാഷിദ് പാലേരി, ഹാഷിർ ഫറോഖ് എന്നിവർ സംഗമത്തിൽ സംബന്ധിക്കുകയും വിവിധ സെഷനുകൾക്ക് നേതൃത്വം നൽകുകയും ചെയ്തു.
വിവിധ ജില്ലകളിൽ നിന്നുള്ള ക്ലബ് മെന്റർമാർ പങ്കെടുത്ത യോഗത്തിൽ പുതിയ അധ്യയന വർഷത്തെ കർമരേഖക്ക് അന്തിമ രൂപം നൽകി.
