കോട്ടയം: വിദ്യാർത്ഥികൾക്കിടയിൽ ശ്രദ്ധേയമായ ‘ലെസ് കമ്പാരിസൺ, മോർ ലിവിംഗ്’ (Less Comparison, More Living) എന്ന പ്രമേയത്തിൽ എസ് എസ് എഫ് കാമ്പസ് മെമ്പർഷിപ്പ് കാമ്പയിന് സംസ്ഥാനത്ത് തുടക്കമായി. നവംബർ 20 ന് ആരംഭിച്ച കാമ്പയിൻ ഡിസംബർ 20 വരെ നീണ്ടുനിൽക്കും.
സംസ്ഥാനതല ഉദ്ഘാടനം കോട്ടയം സി എം എസ് കോളേജിൽ വെച്ച് എസ് എസ് എഫ് സംസ്ഥാന ഫിനാൻസ് സെക്രട്ടറി മുഹമ്മദ് അനസ് അമാനി പുഷ്പഗിരി നിർവഹിച്ചു. ജില്ലാ ഭാരവാഹികളായ അബ്ദുറഹീം, മുഹമ്മദ് അമീൻ സുറൈജി, ത്വാഹ അമീൻ വി കെ തുടങ്ങിയവർ സംബന്ധിച്ചു.
സംസ്ഥാനത്തെ ആയിരത്തിലധികം കോളേജുകളിൽ അംഗത്വ കാല പ്രവർത്തനങ്ങൾ നടക്കും. കാമ്പയിൻ്റെ ഭാഗമായി ജില്ലാ, ഡിവിഷൻ, കോളേജ് തലങ്ങളിൽ ഉദ്ഘാടനങ്ങളും ശില്പശാലകളും വെബിനാറുകളും നടന്നുവരുന്നു.
നവംബർ 25 ന് സംസ്ഥാനത്തുടനീളമുള്ള കാമ്പസുകളിൽ മെമ്പർഷിപ്പ് ഡേ പ്രവർത്തനങ്ങൾ നടക്കും. ഒരു മാസം നീണ്ടുനിൽക്കുന്ന കാമ്പയിൻ പ്രവർത്തനങ്ങൾ പൂർത്തിയാകുന്നതോടെ സംസ്ഥാനത്തെ മുഴുവൻ കാമ്പസുകളിലും കൗൺസിലുകൾ പൂർത്തീരിക്കുകയും പുതിയ ഭാരവാഹികളെ തിരഞ്ഞെടുക്കുകയും ചെയ്യും. വിദ്യാർത്ഥികളുടെ മാനസികാരോഗ്യത്തിനും വ്യക്തിഗത വളർച്ചയ്ക്കും ഊന്നൽ നൽകുന്നതാണ് ഈ വർഷത്തെ കാമ്പയിൻ പ്രമേയം.
